लैन देओ बिंद साह्
सिटी हून स्मार्ट होई गेई यू टी दा केह् लाऽ कंधां लीकी भरी टकाइयां भुक्खा टिड्ढ करलाऽ फुब्बारे लाईटां लाइयै नेईं होंदा निर्वाह् भलेआं कीऽ ओ मारी दिंदे, लैन देओ बिंद साह्। पैह्ले पेई मार कोरोना हून आई…
R
Randhir Singh Raipuria
Writer
सिटी हून स्मार्ट होई गेई यू टी दा केह् लाऽ
कंधां लीकी भरी टकाइयां भुक्खा टिड्ढ करलाऽ
फुब्बारे लाईटां लाइयै नेईं होंदा निर्वाह्
भलेआं कीऽ ओ मारी दिंदे, लैन देओ बिंद साह्।
पैह्ले पेई मार कोरोना हून आई नमीं बलाऽ
हत्थ लान निं दिंदी सब्ज़ी कुत्थुं सब्ज़ी खा
ना पैंशन ना खेतीबाड़ी चक्की कि’यां चलाऽ
भलेआं कीऽ ओ मारी दिंदे, लैन देओ बिंद साह्।
आटा, चौल,दही, दुद्ध बधी गे न भाऽ
कुत्थै ध्याड़ी ला, हून माह्नू टब्बर कि’यां रजाऽ
चोरी, सन्नां, डाके मारै जां फाह् गले गी ला
भलेआं कीऽ ओ मारी दिंदे, लैन देओ बिंद साह्।
बच्चे लाड़ी फरमैशां करदे नेईं होंदे पूरे चाऽ
हत्थ लग्गै निं हर चीजें गी गासा चढ़दी जा
पीने दे पानी पर बी बन्नना नमां ऐ लाऽ
भलेआं कीऽ ओ मारी दिंदे, लैन देओ बिंद साह्।
दिल्ली बेइयै करन फैसले नेईं लैंदे कोई सलाह्
आपूं चिकन बिरेयानी खंदे, खंदे श्री पलाऽ
इं’दे घरें ते कोल भरोचे नेईं करदे एह् परवाह्
भलेआं कीऽ ओ मारी दिंदे, लैन देओ बिंद साह्।
———————————————-